Assalamu’alaikum warahmatullah.
Muktamar meugah jinoe di Banda!
Persatuan IDI pihak seuleuah
Harap beuceudah ngon samporeuna
Hai Bapak Dokter nyang meugah-meugah
Beuneutem papah ubat Nek Poja
Meunyo di Aceh hanapeue peugah
Meulimpah ruwah cit le lagoina
Meungkitab mantong na limong buah
Lagee lon kisah dalam media
Dalam SERAMBI kalheueh lon bahas
Uroe nyoe that pah Jurnalisme Warga
Keu ubat gampong bacut takisah
Lon meubeurakah meudua banja
Ubat Endatu watee ka sudah
Hansoele papah jameun ka bida
Jinoe ka canggeh ubat that mudah
Hana that payah bak tajak mita
Asai beuna peng nyang on-on mirah
Meuh’ei sileupah ubat kiminya
Di ureueng gampong sabe lam susah
Seureuba salah ‘ohtee geukira
Ubat that meuh'ei pade that murah
Peunyaket jajah hana bak tunda
Endatu tanyoe meunoe geupeugah
Boh GADONG, BIRAH, KUMILI tiga
Lam sithon sigo pajoh beubagah
Ube na wabah cit hanco dumna
Dumpeue peunyaket Tuhan peusiblah
Ngon Insya Allah bahthat Corona!
Gule bak Leubue tataguen kuwah
Lam sithon beusah siblet tapeuna!
Geukrut putik U peh lada siblah
Tipek beubagah nibak dhoe gata
‘Oh saket ulee sang-sang ka beukah
Deungon Bismillah mustajeueb beuna!
Jan saket batok khak-khok sileupah
Mita beubagah on rabon muda
Ramah deungon ie peujeb sikhan glah
Ngon Insya Allah pulehle teuma
Kadang saket pruet na angen mirah
Gambe cok siblah tabicah sigra
Ta upa bak pruet ngat diruet bagah
Ab- eb bak babah t’ang-t’eung lungkiek pha
Ngon boh keumeudee pih teuntee leupah
Le angen mirah pruet ureueng tuha
Keumadee masak syulok keu lincah
Bahthat bee babah geuntoet that subra
Kadang na kurab lungkiek pha beukah
Meunye na mudah on Drang neumita
Ngon Gapu Ranub neupeh beubicah
Neu intho bagah dalam luengkiek pha
Meunye na teuceue wab le seumeurah
Gambe nyang mirah laju neu upa
Ngon on sikleueng-kleueng pih mustajabah
Sayang sileupah bak jih ka langka
Dum kayee ubat tamita susah
Dilee Unsyiah na geuci pula
Jiteukale khueng panyang sileupah
Lampoh nyang luwah ka “talo” sigra!
Jinoe di UTU meusyuhu meugah
Lampoeh that luwah Herbal geupula
Seumoga udep beumaju bagah
Pabrek ngon ulah patoet geupeuna!
*Terapi Sale, Obat Berbagai Penyakit
Ureueng saket brat jameun geusale
Nyang payah rande sabab leumiek pha
Atawa gob poh ka patah pate
Rhot dicong munje atau cong pala
Di ureueng inong madeueng hana bre
Rhah ija tumpe manyak baro na
Jagale Mablien sinan peulale
Bit ubat Sale lethat seumpeuna
Jinoe ka maju ubat meuseu-e
Keu ubat Sale tanyoe ka lupa
Ban saket bacut laju u Keude
Ba peng siare Mantri ngat kaya
Nyang saket patah uroet hana bre
Nyang patah-pate meunan usaha
Eh ateueh panteue atawa bale
Apui meuhe-he diyub geupuga
Buet ureueng teuga tungoe geurande
Seumpom meuseu-e dileuen meutimpa
Atot bak puno; uram bak munje
Tangkok bak mane; ukheue bak sala
Jameun that mudah ureueng Seumale
Kayee meuseu-e ube-be raya
Jinoe ka langka; bah gampong-keude
Rang kapeue kayee jinoe jareueng na
Ban ulontuwan gampong toe keude
Niet tameusale payah lagoina
Lon bloele arang dua-lhee pate
Ngon nyan seumale ka sithon lama
Dalam pot bungong arang ulon ple
Minyeuk lon re-re apui ngat nyala
Watee hu kalen seu-uem meuri bre
Hanale lale reudeup lon raba
Asap bak reudeuep ubat meuseu-e
Digampong lon me kayee ka langka
Alhamhadulillah ucap tan lale
DM ngen beusee bak lon kureueng ka
Na ureueng tuha lon kalon dilee
Puteh oek ulee bungkok leupahna
Tapi teuga that kha lagee batee
‘Oh dicong kayee talo nyang muda
Ek U tiep uroe hana pre watee
Keu breueh siare cit nyan keureuja
Lheueh ek dua bak; geutamah lom lhee
Teuga ban cagee Allah karonya
Gobnyan tiep malam geu-eh cong Bale
Apui tan padee diyub meubura
Aleh sabab nyan teuga tan lagee
Meunan keuh dilee ureueng dum teuga
Takalon jinoe ureueng dum lhek-phe
Leumiek ban tape bah muda-muda
Peunyaket ramien ban kuwah tuhe
Umu takire baro peuet plohsa!!!
*Menyambut Muktamar IDI ke 31 di Banda Aceh, 22 – 25 Maret 2022:
* T.A. Sakti, Peminat manuskrip dan Sastra Aceh dan Imadul Auwalin, Pecinta Sejarah Aceh
Komentar